Bënunì › Stazions
La stazions Daunëi – Val
L cristian che crë à de bujën de simboi che testimunieia si fede. Chisc simboi possa vester dliejes, capeles, crisc´ y nia per ultim nce na via crucis che mostra su dut chël che nosc Seniëur Gejù Crist à messù patì tl curt tëmp che l à pudù viver sun chësta tiera.
Te Gherdëina, coche nce te dut l rest dl Südtirol, ons na bela cumpëida de simboi de fede cristiana che vën vijitei dantaldut da jënt che patësc o che ie unida tucheda da gran desgrazies. La via crucis Daunëi – Val ie dessegur nce n tel sëni che merita de vester numinà. Chësta via crucis scumëncia tla frazion Daunëi y va de viers dla capela de San Silvester, passan tres n bosch de marueia ai piesc dl crëp de Stevia.
Tl ann 1982, per scumenciadiva dla grupa di jëuni cun a cë l presidënt Georg Lardschneider y cun l sustëni de Seniëur caplan Toni Fiung, se oven mpensà de fé na via crucis te Sëlva. L proiet fova riesc unì azetà dal Cunsëi de Pluania coche nce da duta la populazion de Sëlva.
Gherdëina ie bele da giut incà la valeda di scultëures y patria de gran artisc´. Nscì ne fovel nia stat rie abiné zipladëures per fé la via crucis. N fova riesc a una de adurvé lën de zirm per fé la stazions. Zirm ie n lën dassënn adatà per ziplé.
D'autonn dl ann 1982 fovel unì taià na bela cumpëida de zirms che fova unii metui a desposizion dal Chemun de Sëlva. I lëns, taiei y scurzei, oven pona lascià sté decà nchin l’ansciuda dl ann do.
D’ansciuda i oven pona taiei pro y sentei ite sun ëur dl troi destinà a deventé na via crucis.
Riesc do ova i artisc´ scumencià a desmazé la stazions. Duc i nteressei ova l’ucajion de amiré i scultëures pra l lëur, per n iede nia te si lauratuere, ma alalergia.
La via crucis ie pona unida benedida ala fin de setëmber dal vëscul da ntlëuta Josef Gargitter.
